2010, മാർച്ച് 17, ബുധനാഴ്‌ച

ചിത്രലേഖയ്ക്ക് മനുഷ്യസ്നേഹികളുടെ ഐക്യദാർഡ്യം.

 ചിത്രലേഖയെന്ന ദളിതുയുവതി പയ്യന്നൂരില്‍ നേരിട്ടുകൊണ്ടിരിക്കുന്ന ജാതിപരവും തൊഴില്‍പരവുമായ അയിത്തവും പീഢനങ്ങളും ‘സി.പി.എമ്മിന്റെ ദളിതുപീഢനം’എന്ന എന്റെ പോസ്റ്റിലും കൂടാതെ ‘സത്യാന്വേഷി’, ‘ചിത്രകാരന്‍ ’എന്നിവരുടെ പോസ്റ്റുകളിലും വന്നിരുന്നു.


                                         (ചിത്രലേഖ )
                                ( ഭര്‍ത്താവ് ശ്രീഷ്കാന്ത് )
2010 മാര്‍ച്ച് 12 ന് ഉച്ചയ്ക്ക് രണ്ടുമണിക്ക് പയ്യന്നൂര്‍ ടൌണിലുള്ള കാവേരി ആഡിറ്റോറിയത്തില്‍ വെച്ച്, തനിക്കെതിരെ അക്രമത്തിനിറങ്ങിയ  രാഷ്ട്രീയ-തൊഴില്‍ പ്രസ്ഥാനങ്ങളോട്, പണിയെടുത്തു നിര്‍ഭയമായി ജീവിക്കാനുള്ള സ്വാതന്ത്ര്യത്തിനായി പോരാടുന്ന, ദരിദ്രയും ദലിതയുമായ ചിത്രലേഖയുടെ ധീരതയ്ക്ക് പിന്തുണ കൊടുക്കുവാനും തുടര്‍ന്നും പ്രശ്നങ്ങള്‍ക്ക് പരിഹാരമുണ്ടാകുന്നതുവരെ അവര്‍ക്കും കുടുംബത്തിനും സഹായം എത്തിക്കാനുമായിരുന്നു കണ്‍വെന്‍ഷന്‍.


                                  ( എ.വാസു -അദ്ധ്യക്ഷപ്രസംഗം)


                                  (ചന്ദ്രബാന്‍ പ്രസാദ് ഉത്ഘാടന പ്രസംഗം )


    (എസ്.സിതാര,കെ.അജിത, എ.വാസു, സിവിക് ചന്ദ്രന്‍, രേഖാരാജ് )




ഈ കണ്‍വെന്‍ഷന്‍ സംഘടിപ്പിച്ചത് പ്രത്യേകിച്ച് ഏതെങ്കിലും പ്രസ്ഥാനങ്ങളുടെ നേതൃത്വത്തിലായിരുന്നില്ല. വിവിധ ദേശങ്ങളില്‍ നിന്നുമുള്ള നാല്പതോളം വരുന്ന വനിതകളാണ് ഇതിന്റെ സംഘാടകര്‍. ശ്രീ ഗ്രോ വാസുവിന്റെ നേതൃത്വത്തില്‍ ഒരു കമ്മിറ്റി രൂ‍പീകരിച്ചാണ് കണ്‍വെന്‍ഷന്‍ സംഘടിപ്പിച്ചത്.  സി.പി. എം പോലുള്ള വലിയ പ്രസ്ഥാനങ്ങളോട് ഏറ്റുമുട്ടുന്നതില്‍ ഭയമുള്ളതുകൊണ്ട് ഈ വനിതകള്‍ക്ക് ആവശ്യമായ പിന്തുണ അണിയറയില്‍ നിന്നും കൊടുക്കുവാന്‍ ചില രാഷ്ട്രീയേതര പ്രസ്ഥാനങ്ങളുണ്ടായിരുന്നു. ലേഖാരാജ്, രേഷ്മ ഭരദ്വാജ്, ജസീല.സി.വി, ബോബി തുടങ്ങിയ യുവതികളാണ്  ഊര്‍ജ്ജസ്വലതയോടെ  പ്രവര്‍ത്തിച്ചത്.


                                                ( ബോബിയും രേഖാരാജും )


                                                      (ചിത്രലേഖയും മകളും)
കണ്‍വെന്‍ഷന്റെ പ്രചരണാര്‍ത്ഥം മാര്‍ച്ച് 9, 10 എന്നി രണ്ടു ദിവസങ്ങളിലായി പയ്യന്നൂര്‍ പ്രദേശങ്ങളിലാകെ ലേഖാരാജിന്റെ  നേതൃത്വത്തില്‍ വനിതകളുടെ ഒരു വാഹന പ്രചരണജാഥ നടത്തിയിരുന്നു. ജാഥയുടെ അവസാനം ചേര്‍ന്ന പൊതുസമ്മേളനത്തില്‍ ശ്രീമതി.കെ. അജിത മറ്റും സംസാരിച്ചു. വാഹന പ്രചരണത്തിനിടയില്‍ വനിതാപ്രവര്‍ത്തകരുടെ നേരെയും ഓട്ടോ തൊഴിലാളികളും ജനങ്ങളും തട്ടിക്കയറുകയും അവരുടെ നാടിനെ ജാതിസ്പര്‍ദ്ധയുടെ കേന്ദ്രമായി പ്രചരിപ്പിക്കുന്നതില്‍ ക്ഷുഭിതരാകുകയും ചെയ്തു. ഒന്ന് രണ്ടു സ്ഥലത്തുവെച്ച് ഭീഷണിപ്പെടുത്തുകയും മുഖത്ത് നേരിയതോതില്‍ തട്ടുകയും ചെയ്തു. പ്രചരണം അവസാനിപ്പിച്ച് പിന്മാറിയില്ലെങ്കില്‍ പെണ്ണുങ്ങളെ കൊണ്ടു തന്നെ തല്ലിക്കുമെന്നും ഭീഷണിപ്പെടുത്തിയെങ്കിലും പ്രവര്‍ത്തകര്‍ പിന്മാറിയില്ല. സി.ഐ.റ്റി.യു വിന്റെ നേതൃത്വത്തില്‍ ചിത്രലേഖ, അവരുടെ അമ്മ, അമ്മൂമ്മ എന്നിവര്‍ വേശ്യകളാണെന്ന് പ്രചരിപ്പിക്കുന്ന പോസ്റ്ററുകള്‍ പല കാലത്തായി പല പ്രാവശ്യം പയ്യന്നൂരിലും എടാട്ടും ഒട്ടിച്ചിരുന്നു. മറ്റു ചിലരുടെ പരാതി ചിത്രലേഖ ഉറക്കെ സംസാരിക്കുന്നവളാണെന്നും സന്ധ്യയാകുന്നതുവരെ വണ്ടിയോടിക്കുന്നു എന്നുമായിരുന്നു. അതിലുള്ള അമര്‍ഷവും ചില ഓട്ടോ തൊഴിലാളികള്‍ വെളിപ്പെടുത്തി.


                                                       ( കെ.അജിത )
                                                         ( സിവിക് ചന്ദ്രന്‍ )
                                                                (എസ്.സിതാര )
                                                         ( കെ.എം.സലിംകുമാര്‍ )


                                                                ( കെ.കെ. കൊച്ച് )


                                                     ( ഡോ.എ.കെ. ജയശ്രീ )


                                                                  ( ദീപാ.വി.എന്‍ )


                                                                 ( കെ.കെ.ബാബുരാജ് )
കണ്‍വെന്‍ഷന്‍ അദ്ധ്യക്ഷ സ്ഥാനം വഹിച്ച് പഴയ നക്സല്‍ബാരി പ്രവര്‍ത്തകനായിരുന്ന ഗ്രോവാസുവായിരുന്നു (എ.വാസു). ദളിത് എഴുത്തുകാരനും ചിന്തകനുമായ ചന്ദ്രഭാന്‍  പ്രസാദ്  ഉത്ഘാടനം ചെയ്തു പ്രസംഗം നടത്തി. ചിത്രലേഖയുടെ ഒറ്റയാള്‍ പോരാട്ടത്തിന്റെ നാള്‍വഴികളും ചരിത്രവും അവര്‍ക്കെതിരെയുള്ള അക്രമത്തിന്റെ രാഷ്ട്രീയവും സാംസ്ക്കാരികവും സാമ്പത്തികവും ആത്മീയവുമായ മാനങ്ങളും സ്പര്‍ശിച്ചു കൊണ്ട് വിവിധ തുറയിലുള്ള എഴുത്തുകാരും കവികളും സാമൂഹിക ചിന്തകരും മനുഷാവകാശ പ്രവര്‍ത്തകരും പ്രസംഗിക്കുകയും അവരുടെ തളരാത്ത പോരാട്ടത്തിന് പിന്തുണ പ്രഖ്യാപിക്കുകയും ചെയ്തു. കൂടാതെ ചിത്രലേഖയുടെ ചെറുത്തുനില്പിന് സര്‍വ്വ പിന്തുണയും കൊടുത്തുകൊണ്ട് തളരാതെ നില്‍ക്കുന്ന ഭര്‍ത്താവ് ശ്രീഷ്ക്കാന്തിനെയും ഏവരും അഭിനന്ദിച്ചു. തുടര്‍സഹായങ്ങള്‍ നിലനിറുത്തുന്നതിന് തദ്ദേശവാസികളടങ്ങിയ 10 പേരുടെ ഒരു കമ്മിറ്റി രൂപീകരിക്കുകയും ചെയ്തു.
                                                               ( കണ്ടല്‍ പൊക്കുടന്‍ )


                                                              ( ഇവരെ അറിയില്ല )
സമ്മേളനത്തില്‍ ശ്രീമതി കെ.അജിത, കവിയും ചിന്തകനുമായ സിവിക് ചന്ദ്രന്‍, എഴുത്തുകാരിയായ എസ്. സിതാര, കണ്‍വെന്‍ഷന്‍ കമ്മിറ്റി അംഗമായ കെ. ഗിരീഷ് കുമാര്‍, ദളിത് പ്രവര്‍ത്തകനായ കെ.കെ.കൊച്ച്, ദളിത് എഴുത്തുകാരനും സാമൂഹിക ചിന്തകനുമായ കെ.എം.സലിംകുമാര്‍, ദലിതുവനിതാ പ്രവര്‍ത്തകയായ കോട്ടയത്തു നിന്നുള്ള റസ്ലി എബ്രഹാം, ആദ്യകാല ദളിത് പ്രവര്‍ത്തകയായ വിനിയമ്മാള്‍, വനിതകളുടെയും ന്യൂനപക്ഷങ്ങളുടെ അവകാശങ്ങള്‍ക്കു വേണ്ടി പ്രവര്‍ത്തിക്കുന്ന ഡോ. എ.കെ.ജയശ്രീ, ഫെമിനിസ്റ്റും മനുഷ്യാവകാശപ്രവര്‍ത്തകയും ലൈംഗിക ന്യൂനപക്ഷങ്ങളുടെ അവകാശങ്ങള്‍ക്ക് വേണ്ടി നിലകൊള്ളുന്ന ശ്രീമതി വി.എന്‍. ദീപ,ശ്രീ.കെ.കെ. ബാബുരാജ്, സ്റ്റുഡന്‍സ് ഇസ്ലാമിക് ഓര്‍ഗനൈസേഷനെ പ്രതിനിധീകരിച്ച് ശ്രീ സാദിക്.പി.കെ, ‘മഹിളാ സമക്യ സൊസൈറ്റി’യുടെയും ‘പഞ്ചമി’ എന്ന ദളിതുവനിതാ പ്രസ്ഥാനത്തിന്റെയും പ്രവര്‍ത്തകയായ ശ്രീമതി ബോബി തുടങ്ങിയവര്‍ വിശദമായി സംസാരിച്ചു. പ്രശസ്ത് ചിന്തകനും എഴുത്തുകാരനുമായ
സമ്മേളനത്തില്‍ പങ്കെടുക്കാനിരുന്ന ശ്രീ കെ.വേണുവിന്റെ ഭാര്യയ്ക്ക് ചെറിയ ഒരു വാഹനാപകടം സംഭവിച്ചതിനാല്‍ സ്ഥലത്ത് എത്താന്‍ കഴിയാതിരുന്ന അദ്ദേഹം ഫോണ്‍ വഴി നല്‍കിയ സന്ദേശം ശ്രീ ദിലീപ് രാജ് വായിച്ചു. 
വൈകുന്നേരം 07.30 കൂടിയാണ് സമ്മേളനം അവസാനിച്ചത്. അതിനുശേഷം തുടര്‍സഹായ നടപടിക്കായുള്ള കമ്മിറ്റി രൂപീകരണവും അതിന്റെ മീറ്റിംഗും നടന്നു.
ചില വസ്തുതകള്‍
1) ചിത്രലേഖ വേശ്യയെങ്കില്‍ അവര്‍ക്ക് ഈ മര്‍ദ്ദനങ്ങളും എതിര്‍പ്പും നേരിട്ടു കൊണ്ട് ഓട്ടൊ ഓടിക്കേണ്ട കാര്യമെന്ത് ? നല്ല വരുമാനം നേടികൊണ്ട് ഒരു ലൈംഗിക തൊഴിലാളിയായി ജീവിച്ചു കൂടെ. പോരെങ്കില്‍ അങ്ങനെയുള്ളവരുടെ അവകാശങ്ങള്‍ സംരക്ഷിക്കാന്‍ പോലും പ്രസ്ഥാനങ്ങളുള്ള ഒരു നാട്ടില്‍ ! മറിച്ച് വഴിപിഴച്ചു പോയവരെ നേരെയാക്കുകയാണ് സി.പി.എമ്മിന്റെ ലക്ഷ്യമെങ്കില്‍ ഓട്ടോയോടിക്കുകയെന്ന മാന്യമായ തൊഴില്‍ ചെയ്യാന്‍ അനുവദിച്ചു കൊണ്ട് ഒരു റിഹാബിലിറ്റേഷന്‍ പദ്ധതിയുടെ ഭാഗമായെങ്കിലും അവരെ ജീവിക്കാന്‍ അനുവദിക്കുകയല്ലേ ചെയ്യേണ്ടത്. എന്തു ചെയ്യാം കള്ളവും ലോജിക്കും ഒരുമിച്ചു കൊണ്ടു പോകാന്‍ അല്പം ബുദ്ധിയെങ്കിലും വേണ്ടെ ! മസില്‍ മാത്രം പോരല്ലോ !




2) ഇപ്പോള്‍ ചിത്രലേഖയെ ജോലി ചെയ്യാന്‍ അനുവദിക്കാം പക്ഷേ ഭര്‍ത്താവ് കള്ളു കുടിയനായതിനാല്‍ അയാളെ യാതൊരു കാരണവശാലും ഓട്ടോ ഓടിക്കാന്‍ അനുവദിക്കുകയില്ലത്രേ ! കള്ളുകുടിയന്മാര്‍ വണ്ടിയോടിക്കാന്‍ പാടില്ലെങ്കില്‍ പയ്യന്നൂരിലെന്നല്ല കേരളത്തില്‍ പോലും ആര്‍ക്കെങ്കിലും വണ്ടിയോടിക്കാന്‍ പറ്റുമോ ! യഥാര്‍ത്ഥത്തില്‍ ഉടുതുണിക്ക് മറുതുണിയില്ലാ‍ത്ത ആ കുടുംബത്തിനു നേരെ നല്ലവനായ ആ ചെറുപ്പക്കാരനു നേരെ ഒരു മിശ്രവിവാഹത്തിന്റെ പേരിലുള്ള വല്ലാത്ത അസഹിഷ്ണുതയാണ് പയ്യന്നൂരിലെ ‘തീയബ്രാഹ്മണന്മാര്‍’ കാണിക്കുന്നത്.
                      --------------------
ഇന്ത്യന്‍ ദളിതു ഫെഡറേഷന്‍, കേരളാ ദലിത് പാന്തേഴ്സ് , ദളിത് മഹാരാഷ്ട്രാ, സ്ത്രീവേദി, പഞ്ചമി ദളിതു വനിതാ സംഘം, സഹയാത്രിക,ഫെമിനിസ്റ്റ് കേരള, ഐ.എസ്.ഓ തുടങ്ങിയ സംഘടനകള്‍ കണ്‍ വെന്‍ഷനില്‍ പങ്കെടുത്തു.


പ്രസംഗത്തില്‍ നിന്നും ചിലത് :‌-


“തല്‍പ്പരകക്ഷികള്‍ പ്രചരിപ്പിക്കുന്നതു പോലെ ചിത്രലേഖ ഒരു ചീത്ത സ്ത്രീയാണെങ്കില്‍  ഞാനും ഒരു ചീത്ത സ്ത്രീയാണെന്ന് അഭിമാനപൂര്‍വ്വം പ്രഖ്യാപിക്കുന്നു.”      സിതാര.എസ്


പയ്യന്നൂരില്‍ കുറ്റവാളികളില്ല. കുറ്റകൃത്യങ്ങള്‍ മാത്രമെയുള്ളു! കൃമിനലിസം സാമൂഹികവത്ക്കരിക്കപ്പെട്ടിരിക്കയാണ് പയ്യന്നൂരില്‍. പയ്യന്നൂരില്‍ ഒരു പബ്ബ് ഉണ്ടായിരുന്നെങ്കില്‍ അവിടെ പോകുന്ന സ്ത്രീകളെ വെറുതെ വിടില്ല. ശ്രീരാമസേനയെ പോലെ കുറ്റവാളികള്‍ ഇവിടെ സാമൂഹിക പരിഷ്ക്കര്‍ത്താക്കളായി വിലസുന്നു.”                                                                                 കെ.ഗിരീഷ് കുമാര്‍


“പ്രാന്തവത്ക്കരിക്കപ്പെട്ടവരെ അറയ്ക്കപ്പെടേണ്ട അശ്ലീലമായി മുദ്രകുത്തപ്പെടുകയും അവരെ തുടച്ചു നീക്കപ്പെടേണ്ടവരായി കാണുകയും ചെയ്യുന്നു, മുഖ്യധാരാ സമൂഹം. അതിനാല്‍ അവരെ കൊല്ലുന്നവര്‍, ഇല്ലായ്മ ചെയ്യുന്നവര്‍ ഹീറോകളായി മാറുന്നു.”    
                                                                        കെ.കെ.കൊച്ച്



ചിത്രലേഖയെ പോലെ ചെറുത്തു നില്പുനടത്തുന്നവരുടെ സഹായത്തിന്  ഭൂരിപക്ഷത്തിന്റെ ധാര്‍മ്മിക മൂല്യങ്ങള്‍   ഓടിയെത്തുമെന്ന്  നമുക്ക് എങ്ങനെ ഉറപ്പാക്കാനാകും! സദാചാര സംഹിതകള്‍ പോലീസായി മാറുകയാണിവിടെ”    
                                                                    വി.എന്‍.ദീപ


“സവര്‍ണ്ണ ഫ്യൂഢല്‍ സദാചാര മൂല്യങ്ങള്‍ക്കെതിരെ പോരാടുന്ന ചിത്രലേഖയെ ഊരുവിലക്കുകയും ഒറ്റപ്പെടുത്തുകയും ചെയ്യുന്നത് അദ്ധ്വാനിക്കുന്ന  തൊഴിലാളിവര്‍ഗ്ഗത്തിന് നാണക്കേടാണ് ”  
                                    
                                      കെ. വേണുവിന്റെ സന്ദേശത്തില്‍ നിന്ന്


“മനുധര്‍മ്മവും മാര്‍ക്കറ്റും തമ്മിലുള്ള വ്യവഹാര മണ്ഡലത്തില്‍ ചിത്രലേഖ അവര്‍ക്ക് മുന്‍പ് അനര്‍ഹമായിരുന്ന ഒരു സ്ഥാനം വാങ്ങിയെടുക്കുകയാണ്. തികച്ചും പുരുഷാധിപത്യമുള്ള, ദലിതേതരമായ ഒരു തൊഴില്‍ മണ്ഡലത്തിലേക്ക് അതിക്രമിച്ചു കടക്കുമ്പോള്‍ അത് ജാത്യാധിഷ്ഠിത അക്രമത്തിന് വഴിവെയ്ക്കുന്നു.”                 
                                                        ചന്ദ്രബാന്‍ പ്രസാദ്


“ചിത്രലേഖയ്ക്കു നേരെയുള്ള അക്രമം കൃത്യമായ ജാതി കുശുമ്പ് മാത്രമാണ് ! ഹീന ജാതിയായി കണക്കാക്കപ്പെട്ടിരുന്നവര്‍ അവര്‍ക്കു മേലെയുള്ളവര്‍ ചെയ്യുന്ന തൊഴിലിലേക്ക് അതിക്രമിച്ചു കടക്കുമ്പോഴുള്ള കുശുമ്പ്  !”          
                                                                 സിവിക് ചന്ദ്രന്‍


“ഇ.എം,എസ്സിനേയും  എ.കെ.ജിയേയും തന്റെ വീട്ടില്‍ ഒളിവിലിരുത്തിയ രാഘവക്കുറുപ്പ് സ്വന്തം വീട്ടുമുറ്റത്തെ കിണറ്റില്‍ നിന്നും കീഴാളരെ വെള്ളം കോരിക്കയില്ലായിരുന്നു. കമ്മ്യൂണിസ്റ്റ് കാര്‍ക്ക് അന്നേ ഉള്‍ക്കൊള്ളാനാവാത്ത ആദര്‍ശമാണ് ജാതിബോധവും അയിത്തവും തുടച്ചു നീക്കുകയെന്നത്. അവര്‍ അതിന്നും പിന്തുടരുന്നു. മാര്‍ക്സിനേക്കാളേറെ അവര്‍ വായിക്കേണ്ടത് അംബ്ദേക്കറെയാണ്. ഞാനത് താമസ്സിച്ചു മനസ്സിലാക്കിയ ആളാണ്”
                                     
                                                     ഗ്രോ വാസു(മുന്‍ നക്സലൈറ്റ്)



                               ( ചിത്രലേഖ വീടിനു മുന്‍പില്‍ - മാതൃഭൂമവാരിക)
(ചിത്രലേഖയ്ക്ക് പിന്തുണയും സഹായവും എത്തിക്കുവാന്‍ ആഗ്രഹിക്കുന്നവര്‍ക്ക് അവരുടെ മൊബയില്‍ നമ്പര്‍ :- 9526128764)

18 അഭിപ്രായങ്ങൾ:

  1. നന്ദി, ചിത്രകാരന്റെ പോസ്റ്റില്‍ പടങ്ങള്‍ കണ്ടിരുന്നു. ഐക്യ ദാര്‍ഡ്യം പ്രഖ്യാപിക്കുന്നു.

    മറുപടിഇല്ലാതാക്കൂ
  2. ജാതി വ്യവസ്ഥിതി എന്നാല്‍ Ascending order of reverence and descending degree of contempt എന്ന ബാബാസാബിബിന്റെ നിര്‍വചനം എത്രമാത്രം അര്‍ഥവത്താണെന്ന് തീയന്മാരുടെ ഈ പെരുമാറ്റം തെളിയിക്കുന്നു.കമ്യൂണിസ്റ്റുകാര്‍ക്ക് ഒരിക്കലും അംബേഡ്കറെ മനസ്സിലാക്കാന്‍ സാധിച്ചിട്ടില്ല.പ്രധാനകാരണം അതിന്റെ നേതാക്കള്‍ ആദ്യം മുതലേ സവര്‍ണരായിരുന്നു എന്നതും.
    ചിത്രങ്ങള്‍ക്ക് നന്ദി .ഇവരെ അറിയില്ല എന്ന ടൈറ്റിലിനു മുകളിലുള്ള പഹയരെ ബൂലോകത്തില്‍ ആര്‍ക്കുമറിയാന്‍ വഴിയില്ല.ഏതായാലും പുറകിലുള്ള ബാബുരാജിനെ ഒഴിവാക്കാം.

    മറുപടിഇല്ലാതാക്കൂ
  3. രേഖരാജ് ആണെ, തിരക്കിൽ തെറ്റിപ്പോയി.

    മറുപടിഇല്ലാതാക്കൂ
  4. വാസുവേട്ടൻ പറഞ്ഞതുകേട്ടില്ലേ,എന്നെ പിടിച്ചു ജയിലിലിട്ടത് നന്നായി എന്നെനിക്കിപ്പോ തോന്നുന്നു.കാരണം ,അതുകൊണ്ട് അംബേദ്ക്കർ കൃതികൾ വായിക്കാൻ കഴിഞ്ഞത്.
    ജാതിയെന്ന അതീവ സങ്കീർണ്ണമായ വിഷയത്തിൽ നിന്നും,എത്ര കാലം അന്ധത നടിച്ചു നിൽകാനാകും എന്നതാണ് ,മുഖ്യധാരാ കമ്മ്യുണിസ്റ്റുകൾ നേരിടുന്ന ചോദ്യം.ചില പോക്കറ്റുകളിൽ ഭരണ-പ്രതിപക്ഷ കളികളിച്ച് കാലം കഴിക്കുമ്പോൾ,പുതിയ തലമുറക് സൌകര്യമായിരിക്കും.പക്ഷെ അവരൊന്നോർക്കുന്നത് നല്ലത്‘ ഒരു പാടു മനുഷ്യ സ്നേഹികളുടെ ജീവൻ’കൊടുത്തുണ്ടാക്കിയതാണീ പ്രസ്ഥാനമെന്ന്.
    രക്തസാക്ഷികളേ ഉണ്ടാക്കിയും,ഉണ്ടാക്കിച്ചും പുളച്ചുനടക്കുന്നവരും ഒന്നു മനസ്സിലാക്കുക .ഈ കപട വിപ്ലവബോധത്തിൽ തീരാത്ത കണ്ണീരൊഴുക്കുന്നവർ ആയിരങ്ങളാണ്.(വെള്ളാപ്പള്ളി പറയുന്നത് കേൾക്കുക.:മലബാറിൽ നടന്ന 134-കൊലപാതകങ്ങളിൽ 113-എണ്ണവും തീയരാണു മരിച്ചത്.സോറി;പാർട്ടി ജാതികണക്കെടുക്കുന്നില്ലായിരിക്കാം.
    ആ യോഗത്തിൽ ഗിരീഷ് കുമാർ സൂചിപ്പിച്ച ഒരു കാര്യം പ്രത്യേകം പറയേണ്ടതുണ്ട്.മലബാറിൽ സാമൂഹ്യ-നവോത്ഥാന പ്രസ്ഥാനങ്ങളോ അതിന്റെ നായകരോ ഉണ്ടായിരുന്നില്ല.സമരങ്ങളീലൂടെ-തല്ലുന്നവരും,തകർക്കുന്നവരും,തിരിച്ചു തല്ലുന്നവരുമേ നേതാക്കളായിട്ടുള്ളൂ.ശരിയാണല്ലോ,സ്വാമി ആനന്ദതീർത്ഥരെ പോലെ ജാതിക്കെതിരെ സ്വന്തം നിലക്ക് ചികിത്സിച്ചവരല്ലാതെ(തല്ലുകൊള്ളീ സ്വാമിയെന്ന്)ആരുണ്ട് കേരളം അറിയപ്പെടുന്നവരായി.
    മലബാറിലെ പുതിയ നേതൃത്വങ്ങളേ(എല്ലാ പാർട്ടിയിലും)ശ്രദ്ധിച്ചാൽ ഇതു ശരിയാണന്നു ബോധ്യപ്പെടും.

    മറുപടിഇല്ലാതാക്കൂ
  5. അല്ല ഒരു കാര്യം മനസ്സിലാകുന്നില്ല. ഇവിടെ ഒരു വനിതാ കമ്മീഷനും മനുഷ്യാവകാശകമ്മീഷനും ഉള്ളതായി കേട്ടിട്ടുണ്ട് ? ഇവർ ഈ വിവരങ്ങളൊന്നും അറിഞ്ഞില്ലേ ? ഇവർ ഫിലിം സ്റ്റാറുകളെന്ന ഉന്നതവർഗ്ഗത്തിന്റെ കോമാളിത്ത-അവകാശ ലംഘനങ്ങല്ലാ‍തെ മറ്റൊന്നും അന്വേഷിക്കാറില്ലെന്നു തോന്നുന്നു.ഇവനൊക്കെ കമ്മീഷനും വാങ്ങി രാഷ്ട്രീയചെറ്റകളുടെ കാലു തിരുമ്മലാണ് പണി. നാക്കു ചൊറിഞ്ഞു വരുന്നു.വർക്കല സംഭവത്തോടനുബന്ധിച്ച് ഡി.എച്ച്.ആർ.എം പ്രവർത്തകരെ പോലിസ് മൃഗീയമായി മർദ്ദിച്ചു അവശരാക്കിയിട്ടുണ്ട്. ദളിതരുടെ കാര്യത്തിൽ മാത്രം ഒരു ‌‌‌‌‌‌‌‌‌‌‌‌‌‌‌‌‌‌#@$%^&^%-#$@%*& കമ്മീഷനും ഇടപെടില്ലെന്നു മൻസ്സിലാക്കുക.

    മറുപടിഇല്ലാതാക്കൂ
  6. ഈ പടങ്ങള്‍ കൂടി വന്നപ്പോഴാണ് ചടങ്ങിന്റെ ഒരു പൂര്‍ണ്ണരൂപം ലഭിച്ചത്.
    അഭിവാദ്യങ്ങള്‍... നിസ്സഹായന്‍.

    മറുപടിഇല്ലാതാക്കൂ
  7. “ഇവരെ അറിയില്ല “ എന്ന ഫോട്ടോയിലെ ആള്‍ക്കാരെ എനിക്കറിയാം :)

    ഇടത്തുനിന്ന് വലത്തേക്ക്
    1.മുരളി(ബ്ലോഗ് നാമം പറയുന്നില്ല. ആളെ തിരിച്ചറിയുന്നത് ചിലപ്പോള്‍ അദ്ദേഹത്തിന് താല്‍പ്പര്യം കാണില്ല)

    2.സുധാകരന്‍(ബ്ലോഗര്‍ നാമം ചാര്‍വാകന്‍)

    മറുപടിഇല്ലാതാക്കൂ
  8. @നിരക്ഷരന്‍പ്രിയപ്പെട്ട നിരക്ഷരാ... താങ്കൾക്ക് എന്നെ മനസ്സിലായില്ലേ ? നമ്മൾ മാവേലി കേരളത്തിന്റെ മകളുടെ കല്യാണത്തിന് മൂവാറ്റുപുഴയിൽ കൂടിയതോർമ്മയില്ലേ ? അന്നു ചാർവാകനും കൂടെയുണ്ടായിരുന്നു. ഇവിടെ ഫോട്ടോയിൽ തമാശയ്ക്കു വേണ്ടി ഇവരെ അറിയില്ലെന്ന് എഴുതിയതാണ്.

    മറുപടിഇല്ലാതാക്കൂ
  9. പോസ്റ്റ് നന്നായി. ഞാന്‍ ഇവിടെ വരാന്‍ വൈകി. ചിത്രകാരന്റെ പോസ്റ്റില്‍ ഒരു നീണ്ട കമന്റ് എഴുതിയതിനാല്‍ കൂടുതല്‍ ഒന്നും പറയുന്നില്ല. ചിത്രകാരന്റെ ബ്ലോഗില്‍ എഴുതിയത് എന്റെ കമന്റ് ബോക്സില്‍ വായിക്കാന്‍ അഭ്യര്‍ത്ഥിക്കുന്നു.

    മറുപടിഇല്ലാതാക്കൂ
  10. @കറുമ്പന്‍താങ്കളൂടെ ആശങ്കൾ പങ്കുവെയ്ക്കുന്നു.അഞ്ചാറു വർഷമായി ഒരു പ്രശ്നം നീറിപ്പുകഞ്ഞിട്ടും അവസാനം അത് പൊട്ടിത്തെറിച്ചിട്ടും ഇപ്പറഞ്ഞ കമ്മീഷനുകൾ കന്റില്ലെന്നു നടിക്കുന്നത് അവയുടെ സവർണ്ണതാല്പര്യം മൂലം മാത്രമാണ്.

    മറുപടിഇല്ലാതാക്കൂ
  11. @chithrakaran:ചിത്രകാരന്‍ മാതൃഭൂമിയിലെ ലേഖനം വായിച്ചിരുന്നു. അതിലെ ചിത്രമാണ് ഇവിടെ അവസാനം പോസ്റ്റുചെയ്തിരിക്കുന്നത്.

    മറുപടിഇല്ലാതാക്കൂ
  12. ചിത്രലേഖയ്ക്കെതിരെയുള്ള ജാതി-ലിംഗ വിവേചനത്തിൽ സാംസ്കാരിക കേരളം ലജ്ജിക്കേണ്ടിയിരിക്കുന്നു. ഏതു കാര്യത്തിലും കയറി തലയിടുന്ന ഒരു സാംസ്കാരിക നായകനേയും(?) ഈ കാര്യത്തിൽ കണ്ടില്ലല്ലൊ. അവശരെ കൈവിട്ട കമ്മ്യൂണിസവും തലതിരിഞ്ഞ ‘സാംസ്കാരിക നായകളും’ ആണ് കേരളത്തിന്റെ ഇന്നത്തെ ശാപം.

    മറുപടിഇല്ലാതാക്കൂ
  13. ചിത്രലേഖയുടെ നിലനില്‍പ്പിനായുള്ള സമരത്തിനു എല്ലാ പിന്തുണയും. ഇവിടെ ചിത്രലേഖയെ വേട്ടയാടുന്ന സമുദായം ഇപ്പോഴും പിന്നോക്ക അവശതകളും അവഹേളനങ്ങളും നേരിടുന്ന ഒരു സമുദായമാണെന്നത് രസകരം. തീയ്യ സമുദായം അമ്പലത്തില്‍ പ്രവേശിക്കാനും വഴിനടക്കാനുമൊക്കെ തുടങ്ങിയിട്ടെത്ര നാളായി? ചിത്രകാരന്‍, ചാര്‍വാകന്‍ നിസ്സഹായന്‍ എന്നിവര്‍ക്ക് അഭിനന്ദനങ്ങള്‍ .

    മറുപടിഇല്ലാതാക്കൂ
  14. പോരാട്ടം തുടരട്ടെ...ചിത്രലേഖയുടേത് ഒടുവിലത്തേതാവട്ടെ!

    മറുപടിഇല്ലാതാക്കൂ

ആര്‍ക്കും മനസ്സിലുള്ളത് തുറന്നു പറയാം